Sinaï Mathilda lider di Hóben Goberná
….Resientemente Sinaï Mathilda a bira e lider nobo di e proyekto Hóben Goberná. Sinaï ta den kantidat di otro proyekto, pero nos ta bai papia spesífikamente di hóben goberná i tambe toka algun parti mas di kuantu kos e ta hasi pa nos hóbennan, e ta un hóben hasiendo pa otro hóben. Sinaï tambe ta kolaborá ku EXTRA den diferente proyekto entre nan den esun mas resien ku tabata entrega di lista pa partidonan ku a bai elekshon pero tambe den redakshon.
Hóben goberná
Sinaï, awor akí ta lider nobo di proyekto Hóben Goberná. E ta splika kiko Hóben Goberná ta para p’é. Sinaï: Hóben Goberná ta un parlamento hubenil. E ta un proyekto di Bos di Hubentut. Kaminda nos ta duna e hóben e oportunidat pa sali pa nan derechinan, vosifera i tuma parti di desishonnan ku ta afektá nan futuro. Nos ta guia nan riba e tereno di struktura estatal, kultura, polítika. I nos ta toka e temanan manera desaroyo sostenibel, komunikashon interno i eksterno, debate i derechinan humano.
Historia di Kòrsou i internashonal
Promé ku el a yega asina leu el a forma su mes. Sinaï ta splika ku e gusta historia. Ami ta haña nesesario ora bo ta papia di polítika bo mester papia di historia pasó ora bo ta konsiente di historia bo sa kiko a pasa den pasado, bo sa e lucha ku nos antepasadonan a sigui pa nos por yega kaminda nos ta awe. I esei ta algu ku mi gusta di semper for di mucha. El a studia historia di Kòrsou i internashonal, na EXTRA tambe ora di pre-elekshon el a siña hopi di esaki.
Pashon i persistente
Mas aleu Sinaï a konta nos kiko por spera di dje komo lider di Hóben Goberná. “loke boso por spera di mi ta loke mi ta hasiendo kaba. Solamente e plataforma ta mas grandi na públiko. Mi ta pashoná, persistente i ta kere firme den Kòrsou i ta kere ku Kòrsou tin hopi potensial si nos tin e material i informashonnan korekto aksesibel na nos. I esei ta loke mi tin kana di yuda pa krea e konekshon entre hóben i hende grandi. Pasó e barera mas grandi ku tin ta ku e hóben no ta komprendé e hende grandi i e hende grandi no ta komprendé e hóben. Ya mi ta forma parti di e hóben pero tambe mi tin e parti di e hende grandi ku mi ta bai yuda krea e brùg den otro.
Informá e hóben
Loke nan komo hóben goberná ta bai hasi ta informá e hóben promé. Ta bai tin 6 luna kaminda ta bai guia e hóben riba e partinan ku ya el a menshoná: struktura estatal, kultura i polítika. Despues di esaki ta bai tin un elekshon i ora ta bai skohe e lidernan di parlamento i esnan ku ta bai den parlamento hubenil. Despues kada un ta haña un kartera. I riba e kartera nan ta bai profundisá pa asina nan por bai parlamento real di Kòrsou pa bai vosifera, usa nan bos pa e komunidat di Kòrsou.
Un bon impreshon
Esaki ta su promé bia den Hóben Goberná. Unda e aspirashon aki? El a splika ku tres aña pasá ora e tabata tin 19 aña, si lo a puntr’é kiko e tin gana di bira, 98% su kontesta lo tabata Minister di Ekonomia, pasó e gusta ekonomia i gusta sa kon stabil nos ekonomia ta. Of e lo a bisa bo Minister di Edukashon, pasó e gusta siña. I e ta kere tin hopi punto ku por hasi den edukashon. E aspirashon tabat’ei basta tempu pero awor akí e ta haña e oportunidat. Manera el ta bisa semper, e ta un mucha muhé super bendishoná. Tin asina tantu hende ta kere den dje i ta mira su potensial. Manera EXTRA mes, ku e ta super agradesido na dje. Anto e ta haña tur hóben meresé esei. Tur kaminda ku e pasa, e ta purba di laga un bon impreshon. No un bon impreshon pa e so, pero pa nan keda kòrd’é. Pero pa kambia e tendensia ku nan tin di nos hóbennan di Kòrsou. Ku nos ta flo i nos no gusta traha. Pues,Esei ta Sinaï su intenshon, no pa e so pero pa henter e komunidat di Kòrsou.
Den e kòmbersashon ku Sinaï nos a sinti ku e ta kanando e kaminda pa bira polítiko. Pero el a splika nos ku awor akí e no tin e aspirashon pa bira polítiko. Porta den ‘background’. Na e momentunan aki su mente ta riba algu otro, asina el a bisa nos.
E hóben ta futuro pero tambe e presente
Sinaï ta haña ku nos hende grandinan no tin sufisiente oido pa nos hóbennan i spesialmente esnan di parlamentu hubenil. Hopi hende grandi ta bisa ku nan ke hóben pero ora nan haña e hóben ku e aspirashon, ambishon, nan ta bisa nan “ei warda un ratu”. Nan ta bisa tambe ku nos hóben ta futuro. Pero nos no ta solamente futuro, nos ta presente tambe, duna nos e informashon i alabes duna nos e oportunidat pa implementá. ‘No warda aki 10 aña, ku mi no ta kòrda presis kiko m’a siña pa bai implement’é. Duna nos e oportunidat awor akí. Sostené nos i guia nos. No benta nos den awa, i ora e bai ménos bon bo ta bisa “e no a bai bon”. Guia nos den e proseso.
Inteligensia humano
Mundu ta kambiando, i Sinaï ta kere ta bon pa realisá ku e mundu ta kambiando i informá bo mes riba e desaroyonan. Kiko ta tur e kosnan ku ta kambiando. Manera teknologia artifisial ku ta kresiendo den e komunidat. Pero nan no ta siña nos kon pa hasi uso di dje. Nan ta implement’é den skol i edukashon pero nan no ta siña nos kon ta us’é na e manera korekto. Asina bo ta haña ku hopi di nos no ta sigui buska informashon. Siña nos kon pa hasi uso di dje korektamente pa nos por keda ku nos inteligensia humano.
Djòin Hóben Goberná
For di chikí Sinaï tin e tipo di pensamentunan ei. ‘Si bo wak mi mayornan, nan ta bisa bo mi ta kompletamente otro for di nan pasó nan ta hopi ketu. Ta gewon un dia mi a lanta bisa mi mes mi tin gana di hasi e kos akí. I asina mi a buta mi mente pa hasi tur Loke ku mi ta deseá. Mi no por bisa presis kon esaki a bai. Ta di un dia pa otro el a pasa. Sinaï ke ta e ehèmpel pa otro hóbennan. I p’esei e ta pidi hóbennan pa inskribí pa drenta Hóben Goberná. Ainda tin e oportunidat pa mas hóben por inskribí. Por bishitá e página di Bos di Hubentut, bo ta haña tur informashon. Awor akí ta den e proseso di ‘werving’, un proseso di 3 luna. Ta rekrutá e hóbennan. Debí ku tur hóben tin nan skèdjel, ta wak kua ta e mihó manera pa reuní. Nos ta tene kuenta ku esei pa ku e hóben.
Duna bèk na hóbennan
Sinaï ta bisa “mi sa ku banda di ta lider di e proyekto, bo ta hasi muchu mas pa ku e hóben. Mi ta guia e hóben den nan estudio. Di hóben entre 9 pa 16 aña mi ta guianan ku nan tareanan di skol den wikènt pa 2 ora. Esaki ta individualmente. Esaki mi ta hasi boluntariamente. Na un edat hopi yòn mi a haña oportunidat pa traha kaminda mi ta bisa pa mi edat ta un bon salario. Esei ta mi manera di kontribuí bèk na komunidat i yama danki na tur hende ku ta kere den mi i a duna mi e oportunidatnan aki”.
Proyekto di dos aña
Sinaï, awor ku e ta den e proyekto di Hóben Goberná, ta bai pone énfasis tambe pa hasi algu pa kambia hóbennan su pensamentu, pa nan ta mas enbolbí den e komunidat. Den e periodo di 2 aña, nan ke bai krea programa, tayer, kaminda ta informá e hóben. Komo lider e no ke solamente papia i trese informashon dilanti. Pero aki 2 aña e ke mira un kambio den nos komunidat den e hóben su manera di pensa. I den e hende grandi su manera di wak nos komo hóben. E ta bai ta un proyekto ku un durashon di 2 aña.
Outo-estima
Por wak hopi poster riba sosial media, ku hóben ta haña tiki espasio pa vosiferá den prensa skibí òf esun tradishonal. Tin mas hóben ku ta hasi kos positivo pa komunidat. Pa nan tambe haña chèns di bin dilanti. “Esei ta algu ku mi ta sinti falta di dje. E ta sosten konsistente ku komunidat ta duna nos hóbennan. Pasó tin diferente hóben ta profilá riba diferente tereno. Pero semper bo ta haña e enfoke ta keda riba esnan ku ta hunga beisbòl òf ta partisipá na Miss. Esei mi ta haña mester trese mas den komunidat. No ta solamente e deporte i partisipashon na Miss. Tin hopi mas ku esei”. Bo no mester benta e hóben den awa, pero mester gui’é. Si bo guia e hóben, sostené e hóben, kere den dje, e ta bai kere den su mes mas tantu i asina su outo-estima ta subi. Di e manera akí bo ta krea ku tiki tiki e hóben por logra e futuro ku e ta deseá.
Ken ta Sinaï
Sinaï a kaba mi Bachelor in Business Administration na aña 2023. Awor akí e ta hasi su estudio di Accountant Administratie Consulent na universidat di Aruba, esaki e ta sigui ‘online’. Banda di esaki e ta traha, un trabou di 8 pa 5 di djaluna pa djabièrnè. Ultimamente el a haña e oportunidat, dor di e diferente trabounan ku e ta hasi pa komunidat, di bai Finlandia i bai profundisá riba e tereno di derechinan humano. E tabata hopi ‘leuk’ i dushi, nèt den su temporada di aña tambe.
“Loke mi a saka ta e konekshon. Tabata tin 13 pais. Tur pais tin un otro struktura di polítika anto un otro struktura kon nan ta trese e parti di derechi humano. Loke ami a haña falta di dje, ku henter mi biahe mi a keda pensa “ei, ora mi bai Kòrsou, kiko mi por hasi pa mi trese e parti di derechi humano?. Mesora despues nan a aserká mi pa bira lider di Hóben Goberná, kual un di e puntonan ku e organisashon ta hasi ta duna e hóben oportunidat pa sali pa nan derechinan. Nèt lokual ku mi tabata buska”.
Patriotismo
Sinaï tabata den patfenderei tambe, esaki for di su 10 aña. El a kuminsá komo kabouter. Einan el a siña kose, ku por sierto tambe semper e kier a hasi esta bira kosedó. Despues el a stòp pa un ratu. Ku su 18 aña el a disidí ku e ta bai yuda. ‘Di mi 18, 19 i 20 mi a fungi komo lider. Einan tambe mi a krea un par di relashon asina dushi ku e muchanan. Ya di mes, mi no tin 10 man, kemen, mi mester a hasi un eskoho”. Den e parti di tur loke nan ta hasi na Hóben Goberná, tin tambe e parti di guia e hóben riba e tereno di patriotismo. Pa Sinaï patriotismo ta ora bo ta stima bo pais i bo ke pa bo pais bai dilanti i bo ta kontribuí pa tene esaki den komunidat. Esaki ta un di e lèsnan ku nan ta duna e hóbennan. Manera el a menshoná, ora bo ta papia di stima bo pais bo mester sa e historia. Unabes bo splika e hóben e historia di Kòrsou, bo bai den pasado, kon nos tabata 100 aña pasá, kiko nos antepasadonan a hasi i tur e luchanan, e ora ei bo ta bin komprendé dikon nos ta para akinan. Hopi hóben no ta mira ku polítika ta relatá na nan, pasó nan no sa e historia. Nan no sa kiko a pasa den e 100 añanan akí pa por komprendé unda nos ta. Unabes bo komprendé i ta konsiente di loke a pasa, bo ta bin ripará dikon e ta relatá na abo i bo bida diario. Dikon bo tin e derechi di por tin edukashon. Pasó, no ta tur hóben na tur pais tin derechi di edukashon. Bo ta’tin derechi pa bo ekspresá bo mes libremente, e derechi pa ekspresá bo kerensia i sigui un religion. Tur Esaki ta dor di e lucha ku nos antepasadonan a hiba. Kon ta bai hasié? Sinaï ta sigui splika ku e lo sosodé di un forma kreativo. Si mi por duna un ehèmpel, nan tabatin ‘Junior Youth Parliament’, ku ta un refleho di Hóben Goberná, ku ta pa hóben di 9 pa 13 aña. E lès ei tabata di patriotismo. Di un manera kreativo nan a tres’é dilanti pa e hóben di 9 pa 13 aña. Si e hóbennan akí na final di lès por a splika kiko nan a haña den e lès, e ta kere ku e no lo ta un problema pa e hóben di 16 pa 21.
Inspirashon
Tin un dicho di Albert Einstein ku ta hala atenshon di Sinai. “Try not to become a man of succes, but rather try to become a man of value”. E dicho ta ku “éksito no ta definí kon leu mi a yega, sino e ruta ku mi hasi pa yega kaminda ku mi ke yega”. Anto esaki ta pa ora mi yega den tòp, na manera di bisa den tòp, kaminda mi ke. Mi no ke ta pará einan mi so. Mi ke pa tur rondó di mi, sea nos ta bon ku otro òf nó. Mi ke pa tur hende ta riba e mesun nivel. Esei ta e punto tambe ku mi ta para p’é, Sinaï a bisa.
Hóben Goberná ta alkansabel na telefòn: 461-8103